2020 жылғы 15 желтоқсанда құрылған МТҚБ Парламентаризм институты қысқа уақыт ішінде Қазақстан Республикасындағы заң шығару процесінің сапасын жүйелі түрде арттыруға ықпал ететін жетекші сараптамалық алаңдардың біріне айналды.
Институт қызметі терең талдауға және дәлелді тәсілдерге негізделген заманауи нормашығармашылықты дамытуға бағытталған. Сараптамалық жұмыс заң жобаларын әзірлеудің барлық кезеңдерін қамтиды: тұжырымдамалық пысықтаудан бастап, талдамалық және салыстырмалы-құқықтық материалдарды дайындау, реттеудің ықтимал салдарын бағалау және құқықтық реттеуді жетілдіру бойынша ұсыныстар әзірлеуге дейін. Осы бағытта құқықтық саясат, мемлекеттік басқару және әлеуметтік-экономикалық даму салаларында бірқатар ғылыми-зерттеу жобалары жүзеге асырылды.
Институт қызметінің маңызды бағыты – ауқымды мемлекеттік реформаларды іске асыруға қатысу. 2022 жылы Парламентаризм институтының өкілі Қазақстан Республикасының Президенті Қасым-Жомарт Тоқаевтың тапсырмасымен құрылған Конституцияға өзгерістер мен толықтырулар енгізу жөніндегі ұсыныстарды әзірлеу бойынша жұмыс тобының құрамына енгізілді. 2025 жылы Институт Парламенттік реформа жөніндегі жұмыс тобы аясында сараптамалық қызметін жалғастырып, бір палаталы Парламентке көшу, парламенттік рәсімдерді жаңғырту және заң шығару қызметінің тиімділігін арттыруға бағытталған ұсыныстарды әзірлеуге қатысуда.
Парламентаризм институты заңнамалық бастамаларды дайындау барысында депутаттық корпусқа тұрақты сараптамалық-талдамалық қолдау көрсетеді. 2021–2025 жылдар аралығында Парламент депутаттарымен өзара іс-қимыл шеңберінде заңнаманы жаңғыртуға, нормативтік-құқықтық базаны жетілдіруге және әлеуметтік-экономикалық маңызы бар міндеттерді шешуге бағытталған 173 заң жобасы әзірленді. Жұмыс мемлекеттік органдармен, ғылыми және сараптамалық қауымдастықпен тығыз әріптестікте жүргізілді.
Құрылған күннен бастап бес жыл ішінде Институт 170 заң жобасына талдамалық сүйемелдеу жүргізді, сондай-ақ қолданыстағы заңнаманы 130 бағыт бойынша мониторингтеу, талдау және түгендеу жұмыстары атқарылды. Сонымен қатар, Мажилис қарауындағы 114 заң жобасы бойынша сараптамалық қорытындылар дайындалып, бейінді комитеттерге жолданды. Бұл материалдар жұмыс топтарының отырыстарында депутаттар тарапынан белсенді түрде пайдаланылуда.
Кәсіби пікір алмасу мен ашық диалогты дамытуға ерекше мән беріледі. Парламент депутаттарымен бірлесіп мемлекеттік органдардың, сарапшылар мен ғылыми қауымдастық өкілдерінің қатысуымен 204 дөңгелек үстел, халықаралық конференция және жұмыс кеңестері өткізілді.
Институт қызметінің дербес бағыты – Қазақстан Республикасының Конституциялық Сотымен өзара іс-қимыл. Өзара ынтымақтастық туралы меморандум аясында Конституциялық Соттың өтініштері бойынша 17 сараптамалық қорытынды дайындалып, конституциялық іс жүргізудің жан-жақтылығы мен сапасын қамтамасыз етуге бағытталды.
Парламентаризм институты қазақстандық және шетелдік мемлекеттік органдармен, ғылыми-зерттеу орталықтарымен, жоғары оқу орындарымен, халықаралық ұйымдармен және қоғамдық бірлестіктермен әріптестік байланыстарды жүйелі түрде кеңейтіп келеді. Бүгінгі таңда Қазақстан, Өзбекстан, Грузия және Грецияның парламенттік зерттеу орталықтарымен, ұлттық институттармен, жетекші білім беру мекемелерімен, бизнес-қауымдастықтармен және қоғамдық ұйымдармен өзара іс-қимылды қоса алғанда, ынтымақтастық туралы 23 меморандум жасалды. Серіктестік бірлескен зерттеулер жүргізуге, ғылыми-сараптамалық жобаларды іске асыруға, кәсіби тәжірибе алмасуға және білім беру іс-шараларын ұйымдастыруға бағытталған.
Парламентаризм институтының қызметі қоғам мен мемлекеттің стратегиялық қажеттіліктеріне сай келетін сапалы, теңгерімді және заманауи заңнаманы қалыптастыруға бағытталған.
