Материалдық-техникалық қамтамасыз ету басқармасы мен Қазақстан Республикасы Президентінің Телерадиокомплексі РМК бірлесе, Қазақ күресі федерациясының қолдауымен Жақсылық Үшкемпіров атындағы Jekpe-Jek сарайында ҚР Президенті Іс Басқармасына бағынысты кәсіпорындарының қызметкерлері арасында қазақ күресінен турнир ұйымдастырылды.
Қазақ күрес – бұл ежелгі қазақ халқының ұлттық күрес түрі. Мұнда күш, ептілік пен төзімділік қарсыласқа деген құрметпен және халықтың бай мәдени мұрасымен ұштасады.
Қазақ күресінен өткен турнирдің салтанатты ашылуы шығармашылық ұжымдардың жарқын өнер көрсетуімен ерекшеленіп, спорт пен ұлттық мәдениеттің мерекелік атмосферасын қалыптастырды. Финалдық белдесулер дәстүрлі қазақ әуендерінің сүйемелдеуімен өтіп, жарысқа ерекше салтанат пен ұлттық реңк берді.
Турнир ҚР Президенті Іс Басқармасына бағынысты ұйымдардың үздік балуандарын жинап, әділ бәсекенің, тәжірибе алмасудың және ұлттық спорттық дәстүрлерді насихаттаудың алаңына айналды. 82 келіге дейінгі салмақ дәрежесінде МТҚБ өкілі Ернұр Тұрсын құрметті ІІ орынды иеленді. «Үздік әдіс» номинациясымен ҚР Президенті Телерадиокомплексінің қызметкері Қайырбек Омар марапатталды, ал «Ең жасы үлкен қатысушы» аталымымен «Борабай Даму» өкілі Естай Ташев атап өтілді.
Қазақ күресін дамытудың басты мақсаты — ұлттық спорт түрін дәріптеу мен танымал ету. Бұл спорт түрі қазақ халқының күшін, батылдығын және рухын біріктіріп, жастар арасында мәдени дәстүрлерді сақтау, отансүйгіштікке тәрбиелеу және салауатты өмір салтын насихаттау ісіне үлес қосады.
